Ресей әскері Донбасқа шоғырланды. Украина соғыстың жаңа кезеңіне қалай дайындалып жатыр?
Әскерін Украина шығысына шоғырландырып жатқан Ресей сепаратистер қолындағы Донецк пен Луганск жерін түгелімен бақылауға алып, осы аудандардағы Украина күштерін қоршап алуды көздейді. Ресей бұл мақсатына жете ала ма?
Бұл сұраққа Вашингтондағы стратегиялық және халықаралық зерттеулер орталығының кеңесшісі Марк Кансиан былайша жауап береді.
"Кейінгі бірнеше аптада олар бүкіл елді жаулап алуды мақсат еткен еді. Онымен салыстырғанда бұл жүзеге асуы мүмкін мақсат. Алайда бұлай болуы екіталай. Осы үш-төрт аптада Ресей әскері көп жетістікке жете алмады. Қазір оларда соғысқа жұмылдыруға болатын бірнеше құрылым бар, бірақ көп адамнан айырылған күштерін жаңартуға біршама уақыт керек..."
Сұхбаттың толық нұсқасы мында.
Берлускони Путиннен "қатты көңілі қалғанын" айтты
Италияның бұрынғы премьер-министрі Сильвио Берлускони Украинадағы соғысқа байланысты Ресей президенті Владимир Путиннен "қатты көңілі қалғанын" айтты. Ол бұл сөзін сенбі күні жақтастарының алдында сөйлеген кезде айтқан.
"Украина тәрізді бейтарап мемлекет басқыншылыққа ұшырап, қазір қайсарлық танытып, еркіндігі үшін күресіп жатыр. Украинаға қарсы басқыншылық Ресейді Қытайға кіріптар етті. Өте өкінішті. Бүкіл әлем алдында үлкен жауапкершілікті мойнына алған Владимир Путиннен қатты көңілім қалды, қапалымын" деді Берлускони. Оның сөзінен партияның баспасөз хатшысы үзінді келтіреді.
Il Giornale басылымының жазуынша, Берлускони Киев облысының Буча қаласында "нағыз әскери қылмыс жасалды және Ресей жауапкершілігін жоққа шығара алмайды" деген.
Италия ақпарат құралдарының жазуынша, 85 жастағы миллиардер Ресей Украинаға басып кіргелі бері мәлімдемелерінде Владимир Путиннің атын атамаған. Тек "қақтығыстың ушығуына алаңдаулы" екенін айтумен шектелген.
Осыған дейін Берлускони Путинді "досым" деп атаған, олар бір-бірінің резиденцияларына жиі барып тұрған. 2021 жылы қыркүйекте Путин оны телефонмен туған күнімен құттақтағаннан кейін Берлускони Ресей басшысын "осы заманның соңғы біртуар саяси лидері" деп атаған еді.
Северодонецкіде 10 сәуір таңертең мектеп пен екі тұрғын үй атқылауға ұшырады
Бұл жөнінде Луганск облысы әкімшілігінің жетекшісі Сергей Гайдай хабарлады. Тұрғын үйлердің бірінде бірнеше пәтер өртенген. Кейін өрт сөндірілген. Әзірге толық емес мәлімет бойынша қаза болғандар жоқ.
Еуроодақ Ресей мен Беларусьте тіркелген жүк көліктерін одақ аумағына кіргізуді тоқтатты
Бұл жөнінде Ресей федералдық кеден қызметі хабарлады. Ведомствоның мәліметінше, ЕО елдері Ресейдің Украинаға басқыншылығына байланысты қабылданған бесінші санкция пакетіне сүйенген.
Осыған дейін белорус және ресейлік жүк көліктеріне Еуроодақ аумағынан 16 сәуірге дейін шығу туралы ескерту берілген.
Шектеудің әзірге дәрі-дәрмек, медицина, тамақ өнімдері сонымен бірге ауыл шаруашылық, энергия тасымалдаушы, түсті металл өнімдері мен тыңайтқыштарды тасымалдайтын жүк көліктеріне қатысы жоқ.
ПІКІРЛЕР