БҰҰ: Соғыс басталғалы бері Украинадан 4,3 миллионнан астам адам босып кетті
Мұндай мәліметті БҰҰ-ның босқындар ісі жөніндегі агенттігі таратты.
Ақпаратқа қарағанда, басым бөлігі яғни, 2,5 миллионнан астам адам Польшаға өткен. 671 мыңы – Румынияға, 408 мыңы – Венгрияға, 404 мыңы – Молдоваға, 373 мыңы – Ресейге, 307 мыңы - Словакияға, 19 мыңы Беларуське кеткен.
2022 жылдың басындағы мәлімет бойынша, Украинада 41 млн адам тұрған.
БҰҰ-ның босқындар ісі жөніндегі жоғарғы комиссары Филиппо Гранди мұны "Екінші дүниежүзілік соғыстан бергі Еуропадағы ең ірі босқындар дағдарысы" деп атады.
BBC: Ресей Украинадағы операцияға жетекшілік еткен қолбасшыны ауыстырды
Киевтен шегініп, соғыста едәуір шығынға ұшырағанын мойындаған Ресей Украинадағы операцияға жетекшілік еткен қолбасшыны ауыстырды. Бұл жөнінде аты-жөнін айтпаған Батыс елдерінің өкіліне сүйенген британдық BBC агенттігі хабарлады.
Агенттік дереккөзінің айтуынша, Оңтүстік әскери округке жетекшілік еткен армия генералы Александр Дворников жаңа қолбасшы болып тағайындалған. Ол бұрын Ресей әскерінің Сириядағы қимылдарына жетекшілік еткен.
BBC-дің жазуынша, түрлі ресейлік әскери округтар арасында координацияның әлсіз болғаны Ресейдің Украинадағы соғыста қиындыққа ұшырауына себеп болған. Генерал Дворниковтың алдында жағдайды өзгертіп, координацияны күшейту міндеті тұр.
Ақпаратқа қарағанда, Ресей әскеріне 9 мамырға дейін Украинада қандай да бір "жетістікке жету" жөнінде тапсырма берілген. 9 мамырда Мәскеуде Ресей президенті Владимир Путиннің қатысуымен әскери парад өтеді. Украина солтүстігінен әскерін әкеткен Ресейдің Донбасқа шабуыл жасауға шұғыл дайындала бастауын осымен түсіндіруге болады. Бұған қоса, Ресей басшылығы қабылдай алатын келіссөз нәтижесі де "жетістік" ретінде мойындалуы мүмкін.
Ресей қорғаныс министрлігі қолбасшының ауысуына байланысты түсініктеме бермеді. Ведомство сонымен бірге 24 ақпаннан бері операцияға кім жетекшілік еткенін хабарламаған.
Путиннің соғыс жайлы айтқанын плакатқа жазып алып пикетке шыққан Санкт-Петербург тұрғыны Артур Дмитриевке айыппұл салынды
Ол Ресей армиясының "беделін түсіруге тырысты" деп айыпталып, 30 мың рубль көлемінде айыппұл алды.
Ақпаратқа қарағанда, Дмитриев 7 сәуірде метро станцияларының бірінде "Соғыс қаншама қасірет әкелді, оны ұмыту мүмкін емес. Қайта басқыншылық жасағысы келетіндерге ақтау жоқ" деп жазылған (Война принесла столько невыносимых испытаний, горя и слез, что забыть это невозможно. И нет прощения и оправдания тем, кто вновь замышляет агрессивные планы) плакат ұстап тұрған. Оны полиция ұстап әкеткен. Дмитриев бір күн полиция бөлімшесінде қонып шыққан.
Сот Дмитриевтің “соғыс” сөзін пайдаланғанына назар аударған. Ресей Украинадағы соғысты “әскери операция” деп атап, “соғыс” дегендерді қудалайды.
Оның плакатындағы сөзді президент Владимир Путин 2021 жылы 9 мамыр күнгі әскери парад кезінде айтқан.
Ұлыбритания премьер-министрі Киевке барды
9 сәуірде Ұлыбритания премьер-министрі Борис Джонсон Киевте Украина президенті Владимир Зеленскиймен кездесті. Джонсонның Украинаға баратыны жөнінде алдын ала хабарланбады.
Келіссөзден кейін Джонсон Лондон Киевке 120 броньды техника және кемеге қарсы жаңа зымыран жүйесін беретінін мәлімдеді. Бұл жөнінде британдық BBC агенттігі хабарлады.
Халық көп шоғырланған Краматорскідегі вокзалға зымыран соққысы жасалғаннан кейін жұма күні премьер-министр Украинаға 100 млн фунт көлемінде қосымша әскери көмек беретінін мәлімдеген. Лондон Киевке танкілер мен әуе соққыларынан қорғайтын жүйелер, "камикадзе-дрондарын" да береді.
Екі ел басшысы Киев орталығын аралады.
Наурыздың соңында Ресей әскері Украина астанасынан 20-25 шақырым жерге шоғырланып, қалаға соққылар жасаған. Қазір Ресей әскері елдің солтүстігі мен Киев облысынан кеткен.
"Президент Зеленскийдің сенімді басқаруы мен украин халқының қайсарлығы мен батырлығының арқасында Путиннің адам шошырлық жоспары бұзылып жатыр" деді Джонсон.
ПІКІРЛЕР