Ұлыбритания қорғаныс министрлігі Украинадағы соғыс жайлы 6 сәуірде таратқан мәліметі:
Мариупольде әлі ауыр шайқас жалғасып жатыр. Ресей әуе шабуылын тоқтатқан жоқ. Қаладағы гуманитарлық жағдай нашарлап кетті. Мариупольде қалған 160 мыңнан аса адам жарық, жылу, сусыз, медициналық көмексіз отыр. Ресей әскерилері украиналық әскерилерді әлсірету үшін әдейі қалаға гуманитарлық көмекті кіргізбей отыр.
Украина қарулы күштері: Ресей 18600 әскериінен айырылды
Украина қарулы күштерінің бас штабы соғыс басталғалы Ресей 18600 әскериінен айырылды деп мәлімдеді. Бұл статистикаға қаза болғандар да, жараланғандар да кіреді. Бұған қоса, Украина соғыста Ресейдің бес мыңнан аса әскери техникасын жойғанын хабарлады.
Ресей қорғаныс министрлігі 25 наурыздағы хабарламасында "Украинада 1351 әскериі қаза болғанын" айтқан. Содан бері Ресей әскерилерінің шығыны жайлы хабарлама таратпады.
Соғыс уақытында мұндай ақпараттарды тәуелсіз дереккөздер арқылы тексеру мүмкін емес.
Украина жоғарғы радасының (парламенті) отыздан астам депутаты "Ресейдің украина халқын жасаған геноциді жайлы" жоба қаулысын ұсынды.
Жоба құжатында Ресейдің әскерилері Украинада бейбіт тұрғындарды өлтіріп, үйлерді жойып, адамдарды медицина мен азық-түліктен айырғаны үшін Ресейдің әрекетін геноцид деп тану керек деп жазылған.
Бұған қоса, жобада Ресей Совет одағының мұрагері ретінде Украинадағы Голодомор мен Қырым татарларының депортациясы сияқты қылмыстық істерге де жауапты деп көрсетілген.
Гостомельде 400 адам із-түссіз жоғалғаны айтылды
Украинаның Гостомель қаласының мэрі Тарас Думенко қалада 400 адам із-түссіз жоғалып кеткенін айтты.
"Гостомельде оқ тиіп мерт болған бейбіт тұрғындардың мәйіттері табылды, бірақ көп емес. Бұған қоса, біздің аймақтың бірнеше тұрғынының мәйітін Бучадан таптық. Бізде бар расталған деректерге сай, Глебовка тұрғындары Гостомельге келіп, кейін олармен байланыс үзілген" дейді Думенко.
Мэрдің сөзінше, іс-түссіз жоғалған кейбір адамдар оққа ұшуы мүмкін, бірақ олардың мәйіті әлі табылмаған. Думенко "ресейлік әскерилер Бучамен салыстырғанда Гостомельдегі істерін жасырып кетуге тырысқан" деп санайды.
Соғыс уақытында мұндай деректерді тәуелсіз дереккөздер арқылы тексеру қиын.
ПІКІРЛЕР