Қытайдың АҚШ-тағы елшісі Цин Гань "Пекин Ресейге қару-жарақ пен оқ дәрі бермейді, есесіне жағдай ушықпас үшін қолдан келгеннің бәрін жасайды" деп мәлімдеді. Осыған дейін халықаралық басылымдарда Қытай Ресейге көмек ретінде қару-жарақ беруі мүмкін деп жазған. Пекин бұл ақпаратты "фейк" деп атаған еді.
Вашингтон Пекинге "Ресейге қару-жарақпен көмектессе салдары қиын болатынын" ескерткен.
Қытай - Ресейдің ең жақын одақтастарының бірі.
WSJ дереккөзі: Путин Киевті алу жоспарынан бас тартқан
Америкалық Wall Street Journal газеті америкалық жоғары лауазымды шенеунікке сілтеме жасап, Ресейдің Украинадағы соғыста тактикасы өзгергенін жазды.
АҚШ пен оның одақтастары "Путин Украинаға басып кірген соң үш күннің ішінде Киевті алып, Зеленскийді биліктен кетіріп, орнына ресейшіл режимді отырғызуды жоспарлаған" деген еді.
"Путин үш аптаның ішінде бұл жоспарды орындау мүмкін болмайтынын түсінген соң тактиканы өзгерткен сияқты" дейді WSJ дереккөзі.
Басылымға ақпарат берген адам Путин қазір Киевке Украинаның оңтүстік және шығысындағы аумағы жайлы талабын қабылдатуға тырысады деп айтады.
"Мәскеу енді Ресейдің батысы мен Қырымды жалғайтын жолды қамтамасыз етуге әрі Ресейдің Донбасстағы ықпалын нығайтуға тырысады. Егер Украина бейтарап статусты қабылдамай қойса, Путин қазір Ресей әскерилері бақылап отырған барлық аумақты сақтап қалу үшін соғысты жалғастыра береді. Киев статусы не болары белгісіз, себебі Украина бұл қаланы күш салып қорғап жатыр. Ресей Киевті алу үшін күш жинай ала ма, ол жағы да анық емес" дейді газет дереккөзі.
WSJ басылымы "дереккөзінің айтқаны – АҚШ барлау қызметінің бағасы емес, бұл құпия ақпаратты білетін шенеуніктердің сөзі" деп ескертеді.
Украина Ресейдің ультиматумына не деді?
Украина билігі Ресейдің "Мариуполь қаласындағы әскерилеріңді алып кетіңдер" деген ультиматумын орындамайтынын мәлімдеді. Бұл туралы Украина вице-премьері Ирина Верещук "Украинская правда" басылымында мәлімдеді.
"Қару тастап, берілу туралы сөз болмайды. Біз бұл туралы ресейлік тарапқа айттық" деді ол.
Киев бұл ұстанымын БҰҰ мен Халықаралық Қызыл крест комитетіне де айтқан.
20 наурызда Ресей Мариупольді қорғап жатқан украиналық әскерилер мен шетелдік жалдамалыларға "21 наурыз 10.00-12.00 арасында гуманитарлық дәліз арқылы қарусыз қаладан шығып кетіңдер" деген еді.
Мариуполь мэрі Петр Андрющенко Ресейдің ультиматумынан соң ВВС-ге "бір солдатымыз қалғанша күресеміз" деді.
Бұдан бөлек, қала мэрі ресейліктер гуманитарлық дәліз ашқан болып, Мариуполь тұрғындарын Ресейге күштеп эвакуациялап жатыр деп те айтты.
Украина тарабы ресейлік әскерилерден гуманитарлық коридор ашып, бейбіт тұрғындарды Запорожьеге әкетуге мүмкіндік беруді талап етеді.
Мариуполь қаласы қазір Ресей әскерінің толық қоршауында қалған. Демалыс күндері Ресей әскерінің қалаға кіргені хабарланды. Қала билігі соғыс басталғалы Мариупольде екі мыңнан аса бейбіт тұрғын қаза болды дейді.
БҰҰ есебінше, Украинада соғыс басталғалы кемі 902 бейбіт тұрғын қаза болып, 1459 адам жараланды. Ұйым қайтыс болғандар арасында 179 ер адам, 134 әйел адам, 11 қыз бала және 25 ұл бала бар дейді, 39 бала мен 514 ересектің жынысы анықталмаған.
БҰҰ соғыс құрбандары бұдан да көп деп отыр. Осыған дейін Мариуполь қаласы әкімшілігі қалада Ресей шабуылынан 2 мыңнан аса бейбіт тұрғын опат болғанын мәлімдеген.
ПІКІРЛЕР